أطلق العنان لمخيلتك وتصور أن هناك سباقاً يجري الآن بين تويوتا كورولا تم إنتاجها من قبل "زمن الكورونا" تسابق "بوجاتي شيرون" موديل الأمس في طريق مفتوح، ثم توقف عن التفكير فلا مجال للمقارنة، لأن البوجاتي التي قيمتها حوالي 3 مليون دولار سوف تصل إلى هدفها قبل أن يتناول "جير" الكورولا غياره الثاني أو الثالث، النتيجة محسومة.
لكن ماذا لو قرر سائق البوجاتي أن يترك العنان لسيارته بدون أن يقودها إلى الهدف، ومع السرعة الطائشة وقوة الاندفاع ومقود لا يمسكه أحد ستكون مأساة بكل تأكيد. بينما يحسب قائد الكورولا خطواته ويرسم طريقه ويستعد لكل منعطف ويحدد هدفه بدقة، هنا فالفوز تحديداً من نصيب الكورولا في مقابل نتيجة فاشلة من جهة البوجاتي.
وهذا ما يحدث عندما تستخدم خدمات الذكاء الاصطناعي المدفوعة ولا تصل إلى النتيجة المرجوة، بينما يستخدم الآخرون خدمات بسيطة مجانية يحققون بها الهدف في أقصر وقت. ولهذا عزيزي القارئ، ركز معايا واكتب صح توصل أسرع.
الدور: أول حاجة تعملها إنك تحدد لـ(AI) الدور بتاعه، لأنه ببساطة نموذج لغوي فيه كل اللي تحلم بيه، يعني ممكن يكون طباخ أو مهندس صواريخ. تخيل إنت تجيب طباخ وتقوله احسب لي الإيروديناميك لمقذوف معدني قطره "س" وطول "ص" ومع مراعاة الدقة مقابل المدى، أكيد الرد هيكون توم، ولمون، وملح، وكمون. وهكذا لازم أول خطوة لازم تكون تحديد دور مناسب للمحتوى المطلوب.

المهمة: حددنا الدور، يبقى لازم بعدها فوراً نحدد المهمة، وطبعاً لازم تكون ماشية مع الدور. إنت طالب ثانوي عام واكتبلي بحث عن ثاني أكسيد الكربون، كده البحث هيطلع مضبوط ومن إنتاج طالب في ثانوي عام فعلاً، وربنا هيسترها عليك، ومدرس الكيمياء بتاعك مش هيهرش إنك ناحت البحث من الديب سيك.

السياق: وهنا هنضبط الأداء عشان نحقق أكبر قدر من المصداقية، يعني لو مشينا في اتجاه طالب الثانوي اللي عايز يعمل بحث كيمياء، يبقى لازم نقوله معلومة مهمة، مثلاً إنك مدارس عربي ومش لغات، أو إنك مصري والطالب المصري معروف بجبروته وقوته. وهكذا خطوة بخطوة هنقرب نوصل للدقة المطلوبة.

القيود: ودي أنا باعتبرها أهم وأقوى جزئية في كتابة البرومت، وهي الفرامل اللي هتوقف الـ(AI) عن إنه يتقمص دور الدكتور الراحل مصطفى محمود وهو يستطرد في كل حاجة لدرجة تتوهك عن الموضوع الأصلي، أو إنه ممكن مثلاً يعملك بحث 65 صفحة بينما إنت أصلاً على باب الله وكل اللي عايزه 30 سطر ومن ضمنهم العنوان والمقدمة والختام، أو إنه يقعد يطبل في البحث ليك ولمدرس الكيمياء وللغازات كلها اللي فيها ذرة كربون.

المخرجات: وأخيراً يا أينشتين زمانك، وصلنا لمرحلة المنتج النهائي، وده لازم توصفه بدقة برضه، عشان أخوك الروبوتي يحدد بالضبط هيطلع لك وورد ولا إكسل ولا بي دي إف، هيحط صور ولا العملية ناشفة، مهم تديله التنسيق المطلوب. ولو إنت طالب كود لازم تحدد لغة البرمجة اللي تشتغل بيها، لو محتاج ملاحظات لازم تقول، ولو مش عايز متتكسفش قول برضه، وعلشان تمنع الاستهبال لازم تكون صارم وحازم وواضح في طلبك، واتكلم براحتك، مفيش حد هيقرا غيرك انت بس وطبعاً كل فريق العمل بتاع شركة ال (AI) وكل موديلات الذكاء الصناعي على مستوى العالم والنماذج اللغوية الكبيرة المشاركة بغرض التعليم والتطوير بالإضافة الى اخوانا بتوع هواة جمع المعلومات بغرض اتخاذ القرار ومفيش مانع لو المعلومات مهمة شوية يكون في خدمة تاني عندهم علشان تجمعها وتبيعها وفي الاخر تكتشف ان ذرة الكربون اللي انت طالبها سيرتها بقيت على كل لسان.

تحياتي.